肥安施丹師徒對決
國冠盃歐美站由今晚至聽朝激戰連場，最矚目必屬美國上演嘅拜仁慕尼黑鬥皇家馬德里，雙方主帥安察洛堤同施丹「師徒對決」。兩人由意甲祖雲達斯年代，到西甲皇馬時期都曾緊密合作，亦師亦友，「肥安」甚至係輔助施丹坐上「銀河艦隊」帥位嘅「太傅」。兩師徒今仗首度領軍交鋒，別具意義，應會盡情騷哥利，踢場快樂足球助興，有利製造入波，Mic少捧入球大。
（有線61及201台周四早上7時30分直播）
知己知彼 埋牙火併
安察洛堤1999至2001年執教祖雲達斯，雖然成績麻麻，但造就施丹以破當時轉會費紀錄，由祖記轉投皇馬。皇馬2013年聘請「肥安」領軍，特別安排施丹擔任助教，當時盛傳皇馬有心栽培施丹做「隔代」接班人，依家果然成真。事實亦證明「學徒制」非常成功，施丹上季中途臨危受命，成功拯救皇馬，仲捧埋歐聯冠軍，可見盡得「歐聯專家」安察洛堤真傳。因此，兩人非常了解彼此戰術路數，今次交鋒可迅速埋牙火併。
事實上，安察洛堤剛於今夏執掌拜仁帥印，仍然處於摸索之中，需要不斷試陣，所以拜仁之前兩場國冠盃踢得非常開放，包括打和ＡＣ米蘭3比3，大勝國際米蘭4比1；小將祖利安格連上仗大演帽子戲法，睇嚟即使兩大射手羅拔利雲度夫斯基、湯馬士梅拿缺陣，都無礙「肥安」主攻踢法。
ＢＢＣ缺陣 攻力不減
至於施丹亦不讓師傅專美，皇馬踢兩場國冠盃都「做大騷」，當中1比3輸畀聖日耳門、贏車路士3比2都有大量入波，可想而知，豪門參加與呢項重量級熱身賽，都好肯鬥攻搏拳。雖然話皇馬「ＢＢＣ」鋒線C朗、加里夫巴利未歸隊，賓施馬有傷，但回巢嘅西班牙射手艾華路莫拉達亦有級數，左閘馬些路上仗更轟入車仔兩球，皇馬進攻點夠晒多，入波唔成問題。