好勝阿蘇倒戈冇面畀
周六深夜國冠盃歐美站大戰，英超勁旅利物浦喺中立場溫布萊球場，惡鬥「地上最強」巴塞隆拿。利物浦季前熱身賽遇強即屈，近3仗國冠盃輸咗2仗，一眾新兵仍未融入球隊，相反巴塞隆拿喺美斯同蘇亞雷斯歸隊後火力全開，「紅軍」今仗睇怕冇運行，工廠仔推介客勝。
（有線61及64台周日凌晨零時15分直播）
利物浦新兵未夾掂
利物浦領隊高普今個暑假頻頻出手買人，一口氣簽入韋拿杜姆、沙迪奧文尼、卡拉雲、卡利奧斯等新兵，不過呢班都唔係巨星級球員，球隊只係增加人手，但對正選陣容實力未見有大幅提升，而且大批新人仍需要更多時間磨合及適應，睇嚟高普仲要一段時間先執得掂班波。紅軍經過頭4仗熱身賽對弱旅全勝後，近3仗出戰國冠盃就表現未如理想，面對實力強勁嘅車路士、AC米蘭同羅馬，只錄得1和2負慘淡成績，明顯欺善怕惡。唔好忘記，「紅軍」依家仲有成籮傷兵，兩閘位置又一直買唔到心頭好，搞到要搵占士米拿客串左閘，隨時會成為後防漏洞所在。
紅軍今仗遇上「世界級惡爺」巴塞隆拿，「地上最強」實力強橫，而且提前歸隊嘅球王美斯同蘇亞雷斯愈踢愈合拍，之前經歷對些路迪同李斯特城兩場賽事之後，狀態已經大大提升。蘇亞雷斯今場倒戈面對「紅軍」，賽前接受利物浦官網訪問仲話好開心可以見番一班球迷，不過以佢咁好勝嘅性格，落到場都冇面畀，肯定加多兩錢肉緊爭取入波啦！
鬥英超兵勝券在握
巴塞隆拿近2仗轟入7球，盛傳會被賣走嘅阿達杜倫，以及力爭上位嘅新星蒙尼亞艾哈達迪，都會施展渾身解數博教練安歷基信任，鬥心有保證，而且「地上最強」近9次對住英超球隊，豪取7勝1和1負嘅壓倒性成績，格食格味濃之下，大有機會擊退利物浦。