PSG里昂搶頭彩大激鬥
法甲將於下周開鑼，今晚率先進行法冠盃睇吓邊隊攞頭威；上季三料冠軍巴黎聖日耳門（PSG）喺中立場奧地利對亞軍里昂。PSG雖然失去射手伊巴謙莫域，但亦簽入基祖華克、賓艾化、謝斯洛迪古斯等猛將，實力有增無減，季前4場熱身賽全勝，球員已上晒力。里昂上季打破聖日耳門聯賽不敗之身，無懼對手霸氣，今場有力攻破對手大門，捧入球大啱數。
（TVB 301周日凌晨2時45分直播）
里昂火力唔失禮
巴黎聖日耳門財力雄厚，簽新兵代替伊巴謙莫域並唔困難，球會接連收購西維爾射手基祖華克、皇馬前鋒謝斯洛迪古斯，就用咗5,000萬歐元（約4.3億港元）。由尼斯來投嘅賓艾化，上季法甲轟入17球，攻力有保證，呢3位新兵足以彌補伊巴謙莫域轉投曼聯嘅損失。PSG今季改由艾美利執教，呢位帶領西維爾3奪歐霸盃嘅名帥初到貴境，自然想盡快取得佳績，連熱身賽都踢得有聲有色，4戰全勝，包括國冠盃擊敗國際米蘭、皇馬，上仗更大炒李斯特城4蛋，走勢凌厲，當然要乘勢強攻里昂，先捧法冠盃為新球季壯聲威。
里昂近3仗熱身賽贏晒，包括上仗以3比2擊敗賓菲加，全攻表現踢得好放。里昂射手拿卡錫迪上季法甲射入21球，勢必成為PSG防線心腹大患。里昂上季曾以2比1擊敗聖日耳門，率先打破呢支豪門上季聯賽不敗之身，絕對唔嘢小，今仗就算贏唔到，都應該可以搵到士哥，一於捧大盤。