大家揸住3分和都冇壞
奧運女足G組上演重頭戲，美國女足迎戰法國女足，已連續3屆奪金嘅「美女」實力固然超班，但新興勢力「法女」亦不容忽視，佢哋以女子歐聯冠軍里昂為班底，實力於歐洲首屈一指，有力同「美女」拉成均勢。加上雙方上仗都旗開得勝，今仗打和亦冇壞，不妨敲和波博取高回報，想穩陣可選擇入球細。（myTV Super周日凌晨4時直播）
美國女足首仗以2比0輕取新西蘭女足，表現唔算突出，似有留力情況，畢竟奧運賽程頻密，唔可以場場搏盡，以免後勁不繼，影響爭金機會。賽制上，每組首兩名可直接晉級8強，仲有兩組最佳第3位可以出線，換言之，3組共12支球隊，有8隊可踢8強，出線實在「太容易」，對於美國女足等勁旅而言，冇必要分組賽就出真工夫。既然「美女」有3分在手，今場有空間「抖氣」。
德國追擊澳洲炒多鑊
法國女足情況亦差唔多，上仗4比0大勝哥倫比亞女足，今仗唔輸，出線機會十拿九穩，加上對手「美女」實力始終較強，估計「法女」唔會冒進。事實上，雙方近3次交手，「美女」曾贏過2比0及1比0，另1次由「法女」以2比0勝出，可見兩隊碰面入波偏少，入球細值博。
F組德國女足對澳洲女足，「德女」上仗大炒津巴布韋女足6比1，盡顯霸氣，可見呢支過去4屆3次獲銅牌嘅勁旅，今屆爭金決心極強。澳洲女足上仗開波20秒就失守，最終吞加拿大女足兩蛋，防守好弱，相信抵擋唔住「德女」強攻，捧德國女足讓球主勝。
（myTV Super周日凌晨5時直播）
E組中國女足上仗0比3輸畀巴西女足，好彩今仗遇「救星」南非女足，事關兩隊近3次交鋒，中國女足全勝，共攻入26球兼不失，睇好中國女足今場可以打開勝利之門。
（周日早上6時開賽）