兩戰交白卷 難破丹麥
巴西男足金牌夢懸在一線，今屆奧運有地利嘅巴西男奧足，A組兩戰未開齋，而且連波都入唔到，今仗對丹麥男奧足，如果再搶唔到3分，隨時出局。「森巴兵團」壓力愈來愈大，但王牌球星尼馬狀態低迷，想谷都谷唔起。丹麥和波都可以出線，可專心「泊大巴」死守，首選入球細。
（TVB 805、myTV Super周四早上9時直播）
巴西繼首仗同南非互交白卷後，上仗又同伊拉克打和0比0，現時同伊軍一樣都係有2分，入波及失波同為零，並已落後榜首丹麥2分。換言之，如果巴西今場贏唔到丹麥，而同時間開波嘅南非對伊拉克分出勝負，巴西就會出局。
「森巴兵團」瀕臨執包袱，今仗肯定要搏命，但經過兩場悶和後，證明球隊攻力的確存在問題，特別係射手尼馬冇料到，上仗被球迷噓爆，佢仲發爛渣，拒絕受訪，已亂晒方寸。體能教練塞克薩斯都話呢位巴塞球星，身體狀態欠佳，唔足以應付全場比賽，恐怕佢想為國建功，都有心無力。除咗尼馬之外，巴西陣中根本冇其他具領袖魅力嘅球員，想走出困境，並唔容易。
丹麥上仗以1比0擊敗南非，有4分在手，而且仍保持不失球，踢法穩陣。由於呢支北歐球隊今場和波都可以出線，冇必要同巴西駁火，反而更加可能採取穩守，博攞1分已達標。巴西死晒火，更難攻入丹麥大門。
阿根廷焗攻大盤穩陣
D組葡萄牙已獲出線權，阿爾及利亞已出局，換言之阿根廷男奧足對洪都拉斯男奧足，兩隊只能活一隊。雙方現時同分，2004及08年金牌得主阿根廷得失球唔及洪軍，今仗必須贏波，先至可以出線，肯定主攻。洪都拉斯今屆踢法開放，贏阿爾及利亞3比2，上仗對勁旅葡萄牙，亦僅輸1比2，相信今仗唔會捱打，大盤穩陣。
（周四凌晨零時開賽）