日乙今日開快車，榜首球隊北海道札幌岡薩多作客鬥FC橫濱。北海道札幌岡薩多近10仗聯賽8勝2和，狀態勇銳，不過FC橫濱亦有殿堂級射手三浦知良壓陣，近4仗聯賽保持不敗兼攻入8球，無懼與對手鬥攻，今仗一於捧中位數2.5球嘅大盤。
（周四下午5時開賽、馬會網上文字直播）
北海道札幌岡薩多對上一次聯賽輸波是於6月初不敵松本山雅，之後10仗聯賽8勝2和，目前領先次席嘅松本山雅7分兼少踢一場，實力明顯大超班，而且北海道札幌岡薩多近3次面對FC橫濱全部贏晒，心理上佔盡優勢，今仗作客一樣會力求三分。
橫濱三浦知良寶刀未老
不過FC橫濱亦非弱者，佢哋近4仗聯賽3勝1和，老將三浦知良上仗後備入替即建功，協助球隊喺落後0比2嘅劣勢下連追3球，以3比2反勝另一前列球隊大阪櫻花，士氣一流，三浦知良仲以49歲零5個月12日繼續刷新日本聯賽最老入球球員紀錄，印證咗咩叫「家有一老、如有一寶」，既然今場對賽雙方都咁弗，預計大家都唔會踢得保守，中位數2.5球大盤捧得過。