奧運女足上演8強大戰，中國女足惡鬥「剋星」德國女足，兩隊近5次交鋒，「中女」全敗收場，往績非常輸蝕。不過，「德女」亦並非冇弱點，球隊防守差，今屆3場分組賽都有失波。德國女足1.26倍熱W唔抵玩，建議捧1.72倍入球大。
（TVB 802、myTV Super周六凌晨3時直播）
中國女足首仗吞巴西3蛋後，隨後表現已有所改善，以2比0擊敗南非，打和瑞典0比0，以小組次名出線8強。領隊布魯諾大讚球隊不斷進步，特別係上仗打和世界排名第6位嘅瑞典，球員踢出隊形，又有紀律同鬥心，大大提升士氣同信心。佢又話4個月前，內地輿論認為中國女足出唔到線，但依家證明球隊做得到，今仗鬥德國，亦並非冇得打。同埋中國女足夠年輕，大部分球員只係21至25歲，初生之犢不畏虎，今仗無懼同德國火併，博爆冷。
「德女」防守曳場場失波
至於德國女足首仗係威係勢，以6比1大炒津巴布韋，但之後僅打和澳洲2比2，1比2不敵加拿大。歸根究柢因為德國屬於攻強守弱嘅球隊，佢哋係8強之中入波最多嘅球隊，同時失波亦多，就算對住魚腩津巴布韋，都保持唔到清白之身。因此，就算德國女足對中國女足，往績上佔壓倒性優勢，表面上晉級機會較高，但未必可以阻到「中女」入波。