奧運男子足球8強大戰爆發，備受注目嘅巴西男奧足會迎戰哥倫比亞男奧足，雖然主隊有王牌球星尼馬壓陣，不過呢位前鋒狀態未弗，而且成為巴西球迷柴台對象，影響軍心。巴西為爭取史上首面奧運足球金牌，球員承受住沉重壓力，亦都影響發揮，今仗對手哥倫比亞分組賽表現唔錯，受讓梗係博下盤啦。
（MyTVSuper周日早上9時直播）
薛高插尼馬冇資格做隊長
巴西喺小組最後一仗大炒丹麥出線，不過尼馬連續3仗冇波入，又畀自己球迷柴台，信心下降之餘仲令全隊壓力大增，連巴西名將薛高都話尼馬冇資格做奧運隊隊長，成隊波氣氛真係唔多妥！事實上巴西近年喺國際賽成績差勁，無晒霸氣，對手已經唔會好似以前咁未踢先怯。
哥倫比亞雖然只係小組次名晉級，但佢哋3仗賽事1勝2和，上仗更加2比0擊敗首名嘅尼日利亞，證明戰鬥力一啲都唔輸蝕。哥倫比亞今屆召入杜蘭柏邦同杜費路古迪利斯2位大國腳射手，目前已經分別有2球同3球進帳，成功做到帶領一班新人嘅作用，今仗對實問題多多嘅巴西，受讓抵捧。