激情干地醫好心病
首輪英超壓軸戰上演「倫敦打吡」，車路士主場對韋斯咸，車仔上季經歷「寸王之亂」，搞到一敗塗地，但歸根究底只係輸心理，並非輸質素。車仔今季由「激情主帥」干地接手領軍，眾星「心病」應可不藥而愈，發揮真正水平，足以擊敗韋斯咸，車路士讓半一，力捧上盤。
（樂視、Now 621周二凌晨3時直播）
車路士上季季初發生莫連奴怒炒女軍醫Eva一事，導致同球員關係急轉直下，成績走晒樣，開壞個頭，季中換帥搵來希丁克取代「寸王」，只求捱完球季就算。事實上，會方上季尾已為今季做好準備，斟掂干地接任領隊，一早消除不明朗因素。呢位意國名帥曾為祖雲達斯3奪意甲冠軍，佢今夏歐國盃「激情指揮」，率領殘陣嘅意大利殺入歐國盃8強，可以話係將戰術及心理戰發揮得淋漓盡致。
「錘仔幫」作客往績輸蝕
車仔猛將如雲，上季因冇士氣，軍心散漫而一厥不振，干地嘅激情風格，正好可以為球隊注入正能量，踢出應有水平，車仔近5場熱身賽贏咗4場，僅輸畀皇馬，就係最佳證明。同埋車仔上季僅排第10位，無緣今屆歐洲賽，可以專心爭英超，聯賽戰績應會大有改善。
「錘仔幫」韋斯咸上季獲得第7位，的確令人驚喜，但呢類中小型班取得佳績，往往只係曇花一現，正如上季冠軍李斯特城，開鑼戰已輸畀新升班嘅侯城。同埋韋斯咸中場主力皮耶協助法國打入歐國盃決賽後，較遲歸隊，直至上仗熱身賽先至上陣，僅踢15分鐘，恐怕狀態未足以應付今場惡戰。防線主力湯堅斯離隊，亦係不利因素。加上韋斯咸過去6次作客車路士，錄得2和4負，4次敗仗都係輸兩球或以上，受讓半一都冇着數。