另一場英超大戰，阿仙奴主場對利物浦，兵工廠慘變「傷兵廠」，未開鑼已爆傷兵潮，一對中堅梅迪薩卡、基比爾包列斯達踢熱身賽受傷，哥斯尼出戰完歐國盃遲歸隊缺態，領隊雲格好頭痕。加上阿仙奴一向慢熱，過去6季聯賽首仗僅1勝，讓波制唔過。利物浦遇強愈強，受讓平半，下盤值博。
（樂視及Now 621周日晚11時直播）
阿仙奴兩大守將打柴
阿仙奴踢咗5場熱身賽，獲得4勝1和，但付出沉重代價，梅迪薩卡及基比爾包列斯達先後受傷。因此傳出領隊雲格計劃用3,000萬鎊（約3億港元）收購華倫西亞中堅梅斯達菲救亡，但遲遲未成事。加上哥斯尼為法國打入歐國盃決賽，需要放假而缺席季前熱身賽，相信唔夠狀態踢今場大戰。兵工廠3位最有經驗嘅中路守將或一齊倦勤，後防真係危危乎。
阿仙奴中前場亦有隱憂，盛傳中場助攻王奧斯爾有意重返皇馬，隨時放軟手腳，避免受傷影響轉會。事實上，呢位德國國腳同法國射手基奧特亦因為踢歐國盃而遲歸隊，今仗都未必可以披甲，兵工廠僅能半力出擊，冇本錢讓波。
至於利物浦季前進行密集式訓練，包括國冠盃在內，已踢咗9場波，早前更大炒巴塞隆拿4比0。巴塞同兵工廠都係擅於控球在腳，似乎紅軍主帥高普已有方法，對付呢種踢法。事實上，利物浦鬥傳統勁旅，一向有超水準發揮，上季對3支倫敦勁旅阿仙奴、熱刺及車路士，都保持不敗，更雙殺曼城。紅軍今仗遇到殘陣嘅阿仙奴應可全身而退，甚至贏埋都唔奇。