莫帥轉飯鑊首仗客戰未威過
今晚英超頭場終於輪到曼聯登場喇，佢哋會作客般尼茅夫。紅魔今季有「寸王」莫連奴入主，並簽入伊巴謙莫域及天價回購保羅普巴等猛將，未開波先聲奪人，不過唔代表一定贏波，先爆出普巴要坐「跨國波監」唔出得，再有「寸王」新上任首仗客場聯賽全部打和嘅魔咒纏身，造訪般茅唔係贏硬，梗係捧番受讓嘅般茅讓球主勝。
（Now 621及樂視周日晚8時30分直播）
曼聯上季失落歐聯入場券，今季決心重振聲威，先有「寸王」莫連奴入主掌舵，喺羅致神鋒伊巴謙莫域之餘，上周又以2比1擊敗李斯特城捧走社區盾，之後仲斥資近1億鎊買番全能中場保羅普巴，聲勢浩大。
普巴「跨國波監」影響部署
不過平心而論，曼聯上周贏李斯特城表現麻麻，伊巴除咗頂入奠勝士哥外，全場近乎隱形，而日前還發現普巴原來上季為祖雲達斯打最後一仗嘅意大利盃決賽對ＡＣ米蘭，累積夠黃牌，需要停賽1場，就算轉戰英超此禁令仍有效，令佢今仗對般茅要坐「跨國波監」，無疑打亂咗莫連奴嘅部署。
最慘執教過車路士、皇馬、國米等豪門嘅莫連奴，近3次轉飯鑊，為新東家領軍嘅首仗作客聯賽都出師不利，全部打和，同佢作客偏重防守嘅戰術大有關係。般茅上季不被睇好下提早上岸，令人跌晒眼鏡，而且主場出擊常有驚喜，包括上季贏過曼聯添，「寸王」一向謹慎不得不防，況且除咗普巴外，中堅基斯史摩寧亦要停賽，防守受削下不敢冒進，今仗未必贏得，寧捧般茅讓球主勝。