哥帥係歐聯專家
繼英超開鑼後，緊隨焦點輪到歐聯附加賽首回合，今個階段最大牌球會曼城，先作客布加勒斯特星隊。呢支英超豪門今季搵來「歐聯專家」哥迪奧拿執教，明顯希望創造歷史，力爭首度稱霸呢項歐洲球會最高殊榮。曼城亦有運行抽到好籤，對手僅為羅馬尼亞球隊，又點會難到哥帥呢？直取曼城讓球客勝。
（有線61、201台周三凌晨2時45分直播）
自從2008年阿布扎比財團收購曼城之後，球會逐步走上班霸之路，已贏過晒英超、足總盃、英聯盃3大本土錦標，未來目標梗係要首嘗歐聯冠軍滋味。曼城上屆歷史性打入4強，證明佢哋有力問鼎呢項錦標，今季請來哥迪奧拿執教，捧盃機會更高。事關哥帥屬於出名「歐聯專家」，球員時代已為巴塞捧歐冠盃（歐聯前身），教波後又帶領呢支「地上最強」兩次奪冠，過去3季執教拜仁慕尼黑，都入到4強，來到曼城又係佢表演時候。
阿古路磨定刀搶胡
曼城要一圓歐聯冠軍夢，首先要過附加賽呢關，打入分組賽，否則一旦被淘汰，唔止冇晒面，仲會蒙受巨額金錢損失，爭勝戰意肯定高。曼城上仗英超亦旗開得勝，射手阿古路已開齋，最終小勝新特蘭2比1，似有所留力，今仗應會出真功夫，加上哥迪奧拿近7次帶隊參加歐聯首仗賽事，錄得5勝2和佳績，布加勒斯特星隊難以招架。
布加勒斯特星隊光輝不再
布加勒斯特星隊最威水係1986年奪得歐冠盃（歐聯前身），但近年無論國內或歐洲賽均走下坡，近兩屆歐聯更加喺外圍賽或附加賽就出局，其中上屆第3圈對住實力一般嘅柏迪遜，都被淘汰，今次撞正猛將如雲嘅曼城，隨時輸得更慘。