瑪達有火搵出氣袋
今晚女奧足4強全屬冤家路窄之戰，頭場係主辦國巴西女足硬撼瑞典女足。「森巴女將」志在奪金，「女球王」瑪達上仗宴客失威，今仗誓要吐烏氣，況且包埋今屆分組賽在內，巴西近4次同瑞典交手贏咗3次，擺明食住對手，熱捧主勝。
(myTV Super周三凌晨零時直播)
巴西女足實力一向強勁，可惜同巴西男奧足一樣，一直未能奪得奧運金牌，尤其是近3屆決賽2度飲恨，今屆有主場之利，死對頭美國女足又出咗局，集天時地利人和下，梗係想一圓金牌夢。況且，今仗對手瑞典係佢哋嘅「私房菜」，近4次交鋒錄得3勝1和佳績，包括今屆分組賽藉瑪達省兩粒大勝5比1，明顯格食格喇，而且瑪達上仗互射12碼時宴客，差點做罪人，今仗對住「私房菜」梗係攞威，加上近3屆2次闖入決賽，可見「森巴女將」心理質素不俗，擅踢4強戰呢類淘汰賽，主W趁早捧。
加拿大長勝W「德」
另一場4強戰，由德國女足對加拿大女足，雖然闖入準決賽，但德國女足今屆算係近年踢得最差嘅大賽，4戰只獲2勝1和1負，輸嗰場正正係今仗對手加拿大女足，中場核心羅迪拉於分組賽重創提早告別今屆賽事，令實力大削。相反加軍前線尖刀碧琪同姬絲甸冼佳亞合共有5球進帳，今屆4戰全勝之餘，亦係上屆季軍，今屆誓要殺入決賽，客勝有計。
(myTV Super周三凌晨3時直播)