今晚另一場較矚目嘅歐聯外圍賽附加賽首回合，由葡超班霸波圖主場迎戰意甲勁旅羅馬。波圖今季誓要一洗頹風重新崛起，殺入歐聯分組賽係「最低消費」，況且坐鎮火龍球場即變行運一條龍，近7仗歐聯主場出擊贏咗5仗，撞正「作客蟲」羅馬勢必先拔頭籌，主勝有計。
（有線61及201台周四凌晨2時45分直播）
波圖過去2季於葡超被死敵賓菲加騎住，上屆歐聯又喺分組賽出局，今季力圖重振雄風，佢哋以阿布巴卡、巴謙美為首嘅中前場實力唔錯，除咗要擠走賓菲加重奪葡超王座外，喺歐聯至低限度都要闖入歐聯分組賽。
查實波圖喺火龍球場出戰歐聯特別醒神，近7次喺呢度出擊，錄得5勝1和1負，包括贏過英超豪門車路士及德甲大佬拜仁慕尼黑，絕對不容小覷。
羅馬簽「新卡富」未踢得
相反，羅馬卻係名副其實嘅歐聯作客蟲，近9次歐聯造訪其他球隊未贏過，只得4和5負，若果單計上屆4仗客場輸咗3仗，仲狂失15粒，包括畀巴塞大炒六個一皮，條防線真係薄過紙紮。
雖然羅馬已經同拖連奴達成協議，將會用1,700萬歐元（約1.48億港元）收購「新卡富」般奴皮利斯，這名巴西球星將會到羅馬進行體測，但遠水難救近火，今仗肯定唔使預佢，最快要去到次回合先有機會披甲，今夏仲賣走中場核心比真歷，點擋得住主場堅勁嘅波圖呀？主勝不容錯過。