奧運男足今晚進行4強賽事，東道主巴西男奧足迎戰洪都拉斯男奧足，巴西球星尼馬上仗8強鬥哥倫比亞終於開齋，但今仗對手洪都拉斯防守硬淨，尼馬想再入波，並唔容易，加上淘汰賽一戰定生死，雙方會比較謹慎，巴西主W太熱唔抵玩，首選中位數2.5球嘅入球細。
（myTV Super周四凌晨零時直播）
巴西男奧足今屆整體表現令人失望，頭兩場分組賽都打和0比0，直至出線生死戰，被逼到牆角，先至大勝丹麥4球。上仗8強對哥倫比亞，亦只係贏2比0，可見呢支「森巴兵團」反傳統，攻力麻麻，但後防穩健，4戰仍未失波。
森巴4戰1球不失
由於巴西男奧足從未贏過奧運金牌，依家來到4強，爭金壓力愈來愈大，踢法難免傾向保守，避免功虧一簣，相信佢哋只求晉級決賽，已經足夠，唔會奢望大勝。
洪都拉斯男奧足曾於分組賽打和另一支南美勁旅阿根廷1比1，證明佢哋無懼強敵名氣。洪軍上仗8強對南韓男奧足，大踢穩守戰術，最終以1比0小勝對手晉級，既然戰術奏效，今仗應會沿用。值得一提，兩隊曾於上屆8強碰頭，當時巴西一時大意先失波，幾乎陰溝裏翻船，最終驚險反勝，當時尼馬亦有份踢。巴西為免再食驚風散，今仗應會特別小心，先做好防守，睇準機會再作致命一擊，捧入球細（2.5球）為佳。
德國尼日利亞「大」駁火
另一場4強，尼日利亞男奧足對德國男奧足，情況剛好相反，德國今屆4戰狂轟19球，8強對葡萄牙，照大勝4比0，兩位前鋒基拿比、尼斯彼德臣分別已入咗6球及5球，佔據射手榜頭兩位，非常誇張。德國殺得性起，應會繼續主攻。尼日利亞前鋒伊特保今屆亦有4球進帳，而且有車路士中場約翰米基爾助陣，佢上仗都有波入，夠本錢駁火，捧2.5球嘅入球大。
（myTV Super周四凌晨3時直播）