首回合落後摩納哥無路可退
另一場歐聯附加賽次回合，摩納哥主場對維拉利爾；法甲球隊摩納哥首回合即使缺少養傷嘅射手法卡奧，仍然作客贏2比1，晉級機會樂觀。不過「黃色潛艇」身為西甲代表，亦非泛泛之輩，新簽巴西前鋒柏圖迅速上力，首回合有波入，背水一戰勢必大反撲，預料會有激鬥，Mic少首選入球大。
（有線64及203台周三凌晨2時45分直播）
雖然摩納哥有領先優勢，但球隊一向攻強守弱，唔擅長以死守保住勝果，特別係主場出擊更加冇理由退縮，相信佢哋會採取主動，盡量入波拉開領先優勢，令「黃色潛艇」冇得翻身先至係上策。睇番摩納哥近3次喺主場踢歐聯外圍賽及附加賽，合共攻入9球，總入球都係3球或以上，今場好可能再次大手交易。
柏圖夠卡士兼腳風順
維拉利爾今仗唔止要贏波，仲要最少入兩球先至有機會晉級，根本冇得選擇，一開波就必須搶攻，希望盡快收復失地。曾經為AC米蘭多次征戰歐聯嘅柏圖，首回合都有入波，證明佢嘅經驗可以大派用場。值得留意，過去5屆歐聯附加賽，西甲球隊都可以晉級，包括2011/12年球季嘅維拉利爾反勝奧丹斯，因此「黃色潛艇」今趟或者命不該絕，今仗可能來一個大反彈，捧入球大為妙。