複製恒大「勝利方程式」
亞冠8強淘汰賽首回合今晚重燃戰火，當中「中韓大戰」由中超勁旅上海SP主場硬撼韓職「1哥」全北汽車。FC廣州（廣州恒大淘寶）近年於亞冠威到盡，上海SP亦特意複製「恒大方程式」，「變形俠醫」侯克大有機會代替受傷嘅孔卡披甲，實力更加超班，加上今屆5次主場出擊贏晒，料可擊退全北汽車搶先機，2.85倍主勝咁好分頭，真係咪走寶！
（Now 670周二晚7時30分直播）
上海SP嘅星味喺中超絕對係數一數二，佢哋刻意效法3年內2度於亞冠稱王嘅FC廣州（廣州恒大淘寶）條「勝利方程式」，就係以名帥＋星級南美外援＋優秀土炮。首先搵嚟前英格蘭國家隊主帥艾歷臣領軍，再將前恒大奪標功臣嘅南美兵孔卡及艾傑臣收歸旗下，令實力及亞冠經驗全面升呢，配合武磊、于海呢班出色嘅本土球員，學恒大學到足。當中武磊亦唔比艾傑臣等外援輸蝕，現時以5球排喺亞冠射手榜次席之一，就算上仗聯賽有孔卡傷出，今仗未必出得都唔緊要，事關仲有7月從辛尼特重金簽入嘅「變形俠醫」侯克可候命，火力有增無減。
上海SP亞冠主戰贏晒
全北汽車雖喺韓職放到甩轆，但客場戰績認真麻麻，14仗聯賽作客贏得5仗之外，踢亞冠嘅4場客戰亦只獲1勝1和2負，完全唔突出，包括輸過畀另1支中超球隊FC江蘇。睇番上海SP連外圍賽在內，喺今屆5仗亞冠主場全部贏晒，包括擊敗另1支韓職球隊水原藍翼，遇上作客唔掂嘅全北汽車，絕對有力喺首回合先拔頭籌。