皇馬大盤使命必達
西甲已經完成首輪賽事，今晚進行嘅第2周賽事，阿King搵到場心水推介，就係皇家馬德里主場迎戰切爾達，大盤夠穩陣。上季歐聯冠軍皇馬新球季冇咩大手筆收購，但上仗開鑼戰缺少王牌C朗情況下，仍然大炒皇家蘇斯達3粒，展示出強勁嘅進攻火力，中位數3.5球嘅入球大有1.85倍真係咪走寶。
（Now 632周日凌晨2時15分直播）
「銀河艦隊」主帥施丹今個夏天冇為皇馬作重磅收購，更喺季前熱身賽起用大量青訓產品，對現時陣容同班第2梯隊相當有信心，事實上班球員冇令佢失望，上仗開咧戰皇馬主場就以3比0輕取皇家蘇斯達，雖然有C朗缺陣，但另一主力巴利就梅開二度，呢位快翼狀態大勇。季初施丹仍未定出最佳陣容，一班球員必定盡騷哥利務求博取施丹歡心。相反切爾達開鑼戰主場對住升班球隊雷加利斯，贏唔到之餘仲畀對手偷襲得手，開衰個頭士氣點會好，今仗作客皇馬只會淪為炮灰，不過主W同讓球主勝都冇肉食，不如敲吓大盤好過。
至於另一場較遲開波嘅西甲，由馬德里體育會作客上文提過嘅雷加利斯，雷加利斯西甲處子戰表現令人驚喜，加埋今季主場首次出擊，必定畀多兩錢肉緊，馬體會對住呢啲主守球隊冇咩板斧，讓波唔穩陣，冷敲2.55倍嘅讓球主勝。
（Now 632周日凌晨4時15分直播）
拿玻里AC合演入球騷
最後推介埋意甲直播賽事，今周焦點賽事自然係拿玻里主場硬撼AC米蘭，AC上仗有哥倫比亞前鋒卡路士巴卡連中三元，腳風順到冇朋友，拿玻里射手梅頓斯剛仗起孖亦唔輸蝕，再者雙方後防唔穩陣，上仗同樣失2粒，今場入球騷味濃，1.7倍入球大值博。
（TVB 301周日凌晨2時45分直播）