2018世盃外圍賽亞洲區12強賽今晚開打，最矚目嘅必屬A組「韓中大戰」，由南韓主場硬撼中國。「太極虎」之前已連續8屆躋身世盃決賽周，成績之穩定冠絕亞洲，而且上圈外圍賽8仗全勝兼保持清白之身，表現好過「掹車邊」晉級嘅中國幾條街喇，一於捧南韓2.12倍嘅讓球主勝。
（Now 670周四晚7時直播）
現階段12支球隊分2組角逐，每組頭2名直接進軍俄羅斯踢決賽周，而2支小組第3名就要對撼打主客兩回合附加賽，勝方再同中北美洲區第5圈嘅「4哥」打主客兩回合賽事，先可拎到入場券，為免要出戰咁多附加賽，各隊必定會在12強賽寸土必爭，以小組頭兩名為目標。
南韓上圈外圍賽以8戰全勝姿態晉級，就算唔計主場對科威特被國際足協判贏3比0，其餘7仗「太極虎」皆保持冇失波，佢哋近8屆決賽周除咗2002年以主辦國身份自動入圍，其餘7屆均能喺外圍賽取得出線資格，穩定演出連日本都望塵莫及。
相反，中國上次殺入世盃決賽周，已經係2002年韓日世盃嘅事，佢哋上圈全靠最後1仗擊敗篤定出線嘅卡塔爾，先僅僅壓過北韓及約旦，成為4支小組最佳第2名之一，認真忟水。南韓今仗召入孫興民、奇誠庸、具滋哲及池東沅等外流球星，仲有金英權、洪正好、張賢秀等喺中超搵食嘅一班「無間道」，對中國球員熟到爛，能提供有利情報助「太極虎」輕取中國，讓球主勝最好路。
日本強陣猛炸阿聯酋
至於南韓死敵日本，今晚較早時間喺B組主場迎擊阿聯酋。日本上圈外圍賽首仗主場意外被新加坡逼和0比0，好彩之後連贏7仗，吸取教訓今次唔會輕敵。阿聯酋上圈以最佳第2名身份晉級，實力差日本一皮，早前同未能殺入12強賽嘅北韓「拍跳」都輸2粒，狀態極曳，以香川真司、本田圭佑及岡崎慎司為首嘅「東瀛火藥庫」，實炸到阿聯酋防線穿晒窿，1.64倍讓球主勝咪錯過。
（Now 671周四晚6時35分直播）