衝擊趁地利報仇大起奧城
國際賽結束之後，焦點又落番各地聯賽，阿King今次焦點係美洲聯賽度，重心屬於美職蒙特利爾衝擊主場對奧蘭多城。雙方各有1位大牌球星領軍，衝擊自然係杜奧巴，至於奧蘭多城當然係卡卡，不過杜奧巴有傷在身，今場未必見到佢，好在衝擊有位入波更多嘅皮亞迪壓陣，主場誓搶攻報番首循環輸波之辱，中位數2.5/3球嘅1.7倍大盤值捧。
（TVB 302周四早上7時30分直播）
38歲嘅杜奧巴今季聯賽轟入8球，若然缺陣對衝擊攻力點都有啲影響，但衝擊真正數胡人物其實係阿根廷中場皮亞迪。呢位「10號仔」今季已經轟入14球，表現尤在杜奧巴之上，屬球隊首席射手，喺佢率領下衝擊今季大踢「性感足球」，入40球但亦失38球，可以話係有前冇後。至於奧蘭多城嘅34歲老將卡卡上場對紐約城，個人梅開二度，協助奧蘭多城贏2比1，佢今季亦有6球進帳。呢位巴西國腳5月首循環對蒙特利爾衝擊，貢獻2次助攻幫球隊反勝2比1，表現有心有力，咁蹺當時杜奧巴又係缺陣，但今次衝擊有主場之利，必盡情狂攻為報一敗之仇，今場入球大好路。
串保地花高細鹽湖城勝
另1場美職皇家鹽湖城主場對洛杉磯銀河，雙方過去6次交鋒，有5次由佔主場一方勝出，另1次則打和，可見地利決定勝負，而且皇家鹽湖城近3次主場出擊都贏波，一於再追2.05倍嘅主勝。（TVB 302周四早上9時30分直播）而巴甲方面，保地花高主場對富明尼斯，呢個對碰有1個特性，就係好少波入，兩軍近4次對壘，每次總入球都係兩球或以下，最好選1.65倍入球細。
（周四凌晨3時開賽）