輸咗打吡 無心歐霸
繼歐聯揭開戰幔之後，今屆歐霸分組賽於今晚正式開打，最矚目之戰，梗係A組首輪曼聯作客荷甲球隊飛燕諾。曼聯剛於打吡戰輸波，連勝勢頭被打窒，而且佢哋有冇心爭歐霸亦成疑問，況且紅魔近5仗歐洲賽客場出擊未贏過，撞正有前紅軍「金霸王」古積特壓陣嘅飛燕諾，想贏波反彈唔易，飛燕諾主場受讓咁筍，讓球主勝咪錯過。
（now 670周五凌晨1時直播）
曼聯喺新帥「寸王」莫連奴帶領下，的確逐漸走出谷底，連社區盾在內頭4仗正式賽事贏晒，不過日前喺聯賽嘅同市打吡以1:2不敵死敵曼城，「寸王」更有排錯陣之嫌，真係畀人打窒道氣。而且莫連奴一向「大雞唔食細米」，既然今屆曼聯冇得踢歐聯，一般估計佢會以重奪英超為首要目標，出戰細奀嘅歐霸戰意難測，況且啱啱眾將喺打吡戰搏得好盡，仲要輸埋實在力疲心傷，「寸王」賽前講明會派「福仔」拉舒福特披甲，隨時收起年紀唔輕嘅神箭伊巴謙莫域都唔奇，況且朗尼、 米希達利恩、連格、勞基梳爾同菲爾鍾斯全部冇份出征荷蘭。
飛燕諾古積特弗到震
查實曼聯上季於歐洲賽場成績差強人意，尤其係作客，計晒歐聯及歐霸在內，近5仗歐洲賽客場只錄得1和4負，就算面對米迪蘭特、禾夫斯堡等歐洲二線球隊都冇啖好食。雖然近年荷甲水準每況愈下，但飛燕諾開咧後5場聯賽全勝，信心爆棚，老將隊長古積特已有3球進帳，弗到漏油，呢位前利物浦前鋒出晒名係拚命三郎，以往對曼聯亦屢有佳作，包括2011年3月聯賽贏紅魔3比1之役大演帽子戲法，今仗可乘對手戰意成疑佔到甜頭，讓球主客和飛燕諾仲受讓1球，必捧讓球主勝。