今晚同聽朝夾埋有超過30場波，阿King就睇中咗聽朝上演嘅美職賽事，由芝加哥火燄主場對華盛頓聯隊。火燄主場表現始終有保證，面對傷兵滿營加上作客戰績唔算突出嘅華盛頓聯隊，阿King睇好佢哋可以成功反彈，一於捧火燄贏波。（TVB 303周六早上8時直播）
火燄上仗喺主場輸畀FC多倫多，但對手係東岸榜首球隊，屬情有可原。火燄喺自己地頭演出始終有保證，唔計對FC多倫多嗰場，之前9仗錄得5勝4和嘅成績，可見佢哋主場係有一定威力。火燄今仗可以話係強陣出擊，陣中冇任何傷停問題，前鋒米高迪利奧連續3場聯賽都有波入，狀態實在唔錯，加上佢哋早前作客曾經以2比6畀華盛頓聯隊大炒，今仗肯定希望復仇，戰意唔使懷疑。
相比起強陣嘅火燄，華盛頓聯隊兵源就真係短缺，球隊有後衞基斯哥比、中場哥連馬田、查列謝菲利、前鋒路菲、艾哈捷卡馬拉同門將賀頓因傷缺陣，今仗只能靠有限球員應戰。華盛頓聯隊作客成績亦唔見得好好，球隊近8次客戰錄得5和3負嘅戰績，1場都贏唔到，今仗兵微將寡相信難以對火燄構成威脅，阿King推介主勝。
森多利亞AC做大騷
同日較早時間有場意甲，由森多利亞主場對AC米蘭。森多利亞前鋒加利亞雷拉連續兩場有波入狀態唔錯，至於AC今場有前鋒麥巴耶尼安停賽刑滿復出，兩軍火力強勁捧大盤。（TVB 302周六凌晨2時45分直播）至於法甲嘅巴黎聖日耳門連續3場贏唔到谷埋一肚氣，今次作客對住上季兩循環都大勝嘅卡昂，相信有望大勝吐烏氣，捧讓球主勝。（TVB 303周六凌晨2時45分直播）