今晚法甲有場獨腳戲，由圖盧茲喺主場對班霸巴黎聖日耳門（PSG）。圖盧茲近期狀態唔錯，球隊入得又失得，主場出擊遇上前線着晒火嘅PSG，相信有望上演入球騷，就算入球大細中位數轉為2.5/3球，阿King一樣睇好可以開大盤。
（TVB 303周六凌晨2時45分直播）
圖盧茲開季表現唔錯，只係作客輸過畀巴斯蒂亞，主場出擊未輸過之餘，仲連續3場開大盤。圖盧茲嘅前線組合、丹麥射手巴夫韋迪同瑞典前鋒托禾倫近況甚弗，兩人分別有4球同2球進帳，球隊火力絕對有保證。不過，圖盧茲防線就唔係太掂，球隊最近3場都有失波，今仗表現相信都係入得又失得。
PSG上周開始大開殺戒，先喺聯賽以6比0大炒卡昂，再喺周三凌晨贈迪安4蛋，兩場夾埋入10球認真誇張。不過，迪安同卡昂實力難與今仗對手圖盧茲相提並論，加上球隊中場馬高華拉堤同守將奧里亞養傷，就算前線主力卡雲尼有力撕破圖盧茲防線，但PSG後防未必可以保到清白之身，中位數2.5/3球阿King推介大盤。
紐約城勢炒火燄
同時間西甲有貝迪斯主場對馬拉加，貝迪斯剛喺打吡戰輸咗畀死敵西維爾，士氣肯定有影響。而馬拉加剛喺周中擊敗伊巴打開聯賽勝利之門，前鋒辛度拉美利斯亦成功「開齋」，士氣如虹就算作客都有力搶到分。
（Now 632周六凌晨2時45分直播）
至於較後時間開波嘅美職賽事，由紐約城主場對芝加哥火燄。紐約城雖有中場主將林柏特因傷缺陣，但球隊仍有機會爭取東岸冠軍，今仗勢必去盡。而火焰今季聯賽作客只得1勝2和10負，對上一次作客華盛頓聯隊更慘敗2比6，今仗隨時再輸大大鑊，捧中位數2.5/3球嘅大盤。
（TVB 303周六早上8時直播）