雲格20周年紀念戰遇剋星
阿仙奴近年畀莫連奴帶領嘅車路士剋死，諗住車仔依家由干地領軍，可能有機會轉運，點知今晚喺酋長球場上演嘅倫敦打吡又遇另一剋星球證奧利華，睇嚟連個天都唔鍾意阿仙奴！
（Now 621及樂視LeSports HK應用程式周日凌晨零時30分直播）
31歲嘅年輕判官奧利華主吹今輪英超重磅大戰「倫敦打吡」，阿迷知道後當堂灰晒，事關呢位球證過去8次執法「兵工廠」嘅英超比賽，阿仙奴居然1場都贏唔到，成績只係5和3負，當中最新鮮滾熱辣就係今季開鑼戰主場3比4輸畀利物浦，奧利華「兵工廠剋星」呢個朵真係當之無愧。
兩軍交鋒多爭議判決
事實上阿仙奴同車路士兩隊近年交鋒出現過唔少爭議性判決，上季就發生過迪亞高哥斯達「做戲」搞到阿仙奴中堅加比爾包列斯達食紅牌，加上阿仙奴近6次主場對住車路士都贏唔到，今晚呢場「倫敦打吡」雖然係雲格執教阿仙奴20周年嘅紀念之戰，但咁多不利因素集一身，睇怕阿仙奴想贏波開Party唔係咁易！