奧脫福爆復仇Show
周六英超早場曼聯主場迎戰「狐狸」李斯特城！雙方季初喺社區盾交過手，當時曼聯贏2比1，今晚「狐狸」當然要有仇報仇，挽回面子啦！曼聯早前經歷3連敗、上場聯賽盃終於贏波，返到聯賽為免畀列強拋甩，今仗爭勝心亦唔使懷疑，預計兩軍會合演「入球騷」，大細中位數2.5球，大盤有1.75倍絕對係信心推介！
（Now 621及樂視LeSports HK應用程式周六晚7時30分直播）
衞冕英超嘅李斯特城經過上季神奇之旅後，今季表現回落，開季至今聯賽5戰僅2勝1和2負，唔算突出。今場出征奧脫福前，領隊雲尼亞里就為球隊打咗支強心針，揚言「狐狸」無畏無懼，更大讚球隊雖然要同時應付聯賽同歐聯，但狀態有增無減，球員習慣咗每3日比賽1次，絕冇疲態，仲話今場比賽係報仇好機會，一雪社區盾輸波之辱添！
施利文尼射出身價
李斯特城成績回落，好大原因係占美華迪腳風唔順有關，好在仲有位「及時雨」施利文尼。呢位阿爾及利亞新兵今夏加盟球隊後，上輪聯賽終於首度登場，更梅開二度帶領「狐狸」以3比0大炒般尼，用行動證明自己2,900萬鎊身價係物超所值，配合埋馬列斯等攻擊好手，李斯特城要入波唔難。
曼聯除咗要應付聯賽外，同時亦要喺歐霸盃同英聯盃搏殺，體能或會受影響。紅魔鬼早前經歷3連敗陷入低潮，上場聯賽盃作客3比1打敗英甲球隊諾咸頓，總算止血成功，亦為今仗壯行色！
伊巴謙莫域留力數胡
領隊莫連奴該仗比賽先收起伊巴謙莫域，下半場至換入呢位瑞典球星加強攻力，明顯留力今晚，而且「老鼠仔」拉舒福特亦連續2場有波入，隨時係今場嘅「關鍵先生」！季初雙方喺社區盾交手曼聯贏2比1，相信今晚英超重遇，一定又會夾手夾腳做番場好戲畀大家睇！大細中位數2.5球嘅入球大，絕對係信心推介！