歐聯主場3鬥皇馬贏晒
今晚焦點之戰必屬歐聯F組，多蒙特主場對皇家馬德里，「嬲嬲豬」C朗上仗西甲被換走，發晒脾氣，既不滿要離場，亦反映佢腳風好唔順，內心亂方寸。多蒙特堪稱「皇馬剋星」，近3次歐聯主場鬥「銀河艦隊」獲得全勝，加上「蜜蜂兵團」着晒火，4連勝共轟入20球，難怪獲莊家睇好，要讓番皇馬平半，一於照跟捧多蒙特上盤。
（有線61及201台周三凌晨2時45分直播）
多蒙特今季雖然出售3位主將根度簡、米希達利恩、曉姆斯，兼有射手馬高列奧斯長抖，但攻力不降反升，5場德甲攻入16球，仲多過榜首拜仁慕尼黑。多蒙特上輪歐聯更作客大炒歷基亞6比0，隨後回師德甲又贈達斯泰特6蛋，而且入波球員分布平均，以贏歷基亞為例，6個入球由6位唔同球員射入。因此，就算首席射手奧巴美揚遭對手嚴密看管，馬里奧葛斯、奧士文尼迪比利等中前場球員，都有破門能力。
跑轟戰術食住鬥牛兵
此外，多蒙特跑轟式高壓戰術亦食住「鬥牛兵」，近4次主場對西班牙球隊獲得全勝，而近3次歐聯主場對皇馬亦都贏晒，包括2012年贏2比1、2013年大勝4比1、2014年再贏2比0。多蒙特未踢已贏晒信心，根本唔驚「銀河艦隊」，相信今仗會沿用慣常主攻戰術。
皇馬連續兩場西甲和波，狀態有走下坡迹像，球星C朗喺歐國盃決賽受傷後長抖兩個月，狀態同高峰時期仍有距離，近兩仗都冇波入，上仗踢到72分鐘更被換走。表面上，教練施丹話係希望畀呢位葡萄牙國腳休息，準備今場歐聯，但西班牙消息指呢次調動係「戰術需要」，因為C朗表現欠佳，所以換走佢，施丹嘅「休息論」，只係畀佢好落台。
C朗巴利仔冇態難飛
除咗C朗之外，加里夫巴利早前受傷，即使可以披甲，但水準明顯打折扣，亦係皇馬聯賽又失分嘅另一主因。「銀河艦隊」雙翼飛唔起，防線亦有隱憂，1號門將基羅拿華斯養傷下，副選卡斯拿把關好唔穩陣，左閘馬些路亦受傷缺陣，面對多蒙特嘅快攻，實在危危乎。