祖記大盤薩出血路
兩支喺歐聯分組賽首場贏唔到波嘅球隊，克羅地亞薩格勒布戴拿模同意大利祖雲達斯，周三凌晨喺前者主場進行H組第2輪賽事。兩隊為求取得首場勝利，相信都會全力以赴，阿謙估計今場入波唔會少，一於推介2.5球大盤。（周三凌晨2時45分開賽）
祖雲達斯喺歐聯分組賽首場主場面對西維爾只能踢成0比0，球隊未能旗開得勝，自然令球迷非常失望。祖雲達斯早前雖然喺聯賽輸畀國際米蘭，但球隊好快重拾信心，連贏卡利亞里同巴勒莫，對球員信心有一定幫助。祖雲達斯今仗雖有後衞貝拿迪亞同艾拉有傷上陣成疑，而魯加尼剛喺周六聯賽傷出，但球隊防線仍有充足人腳，加上前線主力希古恩、保羅戴巴拿同文迪蘇傑都可以上陣，今仗有力衝破薩格勒布戴拿模防線。
薩格勒布戴拿模喺首場歐聯分組賽作客0比3輸畀里昂，球隊踢嚟全無還擊之力，球隊喺之後嘅聯賽以2比5輸畀列積卡，令主帥沙拉高卡蘭積卡被炒，由蘇柏暫時領軍。佢哋喺蘇柏嘅帶領下取得兩連勝，表現似乎已重拾正軌，今仗雖然面對祖雲達斯來襲，但球隊主場出擊，為求取得首捷，相信唔會踢得保守，今場隨時上演入球騷，一於捧大盤。
西維爾難讓里昂
同組嘅西維爾會喺主場對里昂，西維爾今仗有後衞高洛薛斯沙克「刑滿」復出，但球隊近5次對法甲球隊輸咗4場；里昂雖然有前鋒拿卡錫迪因傷唔踢得，但費基亞同哥倫天杜利素近期頻頻入波，今仗作客有力全身而退，捧讓球客勝。