細佬磨刀迎「沙加兄弟打吡」
歐聯分組賽今晚有場話題大戰，A組阿仙奴主場迎戰巴素利，將會上演「沙加兄弟打吡」。阿仙奴中場格列沙加近期人氣急升，百步穿楊絕技睇到球迷嘩嘩聲，能力絕對高過大哥杜倫沙加，何況「兵工廠」依家狀態巔峰，主場有力大破巴素利，讓球主勝係細鬼心水之選，2.5球大盤亦係唔錯選擇。
（有線64及203台周四凌晨2時45分直播）
今場波要先講話題人物沙加兄弟，效力阿仙奴嘅細佬格列沙加係瑞士國腳，不過大佬杜倫沙加就係阿爾巴尼亞國腳，2人喺今夏嘅歐國盃決賽周已經交過手，最終細佬帶領瑞士贏波。事實上格列沙加無論名氣同實力都較高，近期為阿仙奴連轟2球遠程世界波技驚四座，今仗趁高基連受傷搶佔正選，證明個天都想睇呢場兄弟大戰。
當然足球比賽唔係個人對決，事實上阿仙奴依家信心爆棚，上場聯賽大炒車路士3比0踢得非常悅目，前線阿歷斯山齊士、禾確特、奧斯爾、伊禾比等個個着晒火，就算基奧特要停賽都冇乜大影響。阿仙奴對上7仗主場歐聯分組賽，全部至少攻入對手2球，今場波似乎又想大開殺戒。
巴素利星散競爭力大減
作客嘅巴素利近年歐聯偶有佳作，14/15球季就曾經喺分組賽將利物浦踢出局，不過球隊近年有唔少球星被挖，好似埃及中場艾利尼今年初就去咗今仗對手阿仙奴。巴素利根基深厚，喺瑞士超仲可以蝦蝦霸霸，但喺歐洲嘅競爭力難免減弱，首仗分組賽主場對住牌面最弱嘅盧多格德斯都贏唔到，今仗作客阿仙奴更加冇運行。