嚟到歐聯呢類高水平嘅比賽，並唔存在太多強弱懸殊嘅情況，好似今晚「死亡C組」次輪慕遜加柏主場對巴塞隆拿，巴塞貴為「地上最強」，但今仗作客之下初盤只讓一球兼低水，反而好似好筍咁引人落疊買上盤，肥叔覺得要呢場「逆思考」，轉玩下盤好過。
(有線62及202台周四凌晨2時45分直播)
之前都講過，好多莊家對強隊都有一種「慣性開盤」，尤其係皇馬、巴塞、曼城、拜仁呢類超級勁旅，總會有理冇理，習慣性開出讓得勁多嘅盤口，佢哋正正利用投注者對呢類強隊嘅盲目追捧，確保收益，所以讓得太辣要轉捧下盤。不過今仗情況有啲唔同，巴塞作客慕遜加柏只讓一球唔算多，仲壓到得番七三水，以往上盤低水通常係讓波一隊「贏波保證」，而且讓一球畀人嘅感覺，係巴塞只要贏一球就唔使輸，猶如搭好個棚引你落疊，太過吸引似係糖衣陷阱。
美斯缺陣影響深
世上邊有咁大隻蛤乸隨街跳，莊家開到個盤咁筍益街坊，其中一個原因，應該係巴塞王牌美斯因傷缺陣，肥叔從來唔多理軍情，不過美斯唔出得，對巴塞影響絕對唔細，況且歐聯強手林立，慕遜加柏近3仗2勝1和未輸過，「地上最強」贏唔到一啲都唔奇，加上莊家開個咁嘅盤口，擺明有蠱惑，肥叔唔會受昆，一於捧慕遜加柏下盤。