４強韓戰 射手過招
今日亞冠盃4強首回合賽事，將會上演精彩嘅「韓職打吡」，由全北汽車先喺主場迎戰FC首爾。兩支勁旅喺8強分別擊敗中超球隊晉級，目前喺韓職亦分列前兩位，睇落似乎係勢均力敵，兩隊都擁有大批出色嘅攻擊球員，而且亦崇尚主攻踢法，老對手交鋒可以放開懷抱砌過，工廠仔認為2.02倍入球大（2.5球）捧得過！
（Now 670周三晚6時直播）
李東國朴主永狹路相逢
兩支韓職勁旅踢法都係崇尚進攻，並且各自擁有一條超強「韓巴」鋒線組合；全北汽車有南韓國腳李東國拍住巴西射手李安納度洛迪古斯，FC首爾亦有朴主永同卡路士阿祖安奴，後者今屆踢9仗亞冠盃就轟入12球，目前排射手榜首位，幾位射手為入決賽肯定無保留全力爭取「士哥」啦！
全北汽車喺韓職實力大超班，目前喺榜首拋離次席嘅FC首爾成14分咁多，捧走聯賽冠軍可謂指日可待，球會當然更加希望贏埋亞冠盃做雙冠王啦！全北汽車喺韓職未逢一敗，喺亞冠盃主場更大開殺戒，5仗主場全部至少射入2球，包括8強戰5比0狂數上海SP，氣勢順到加零一，今仗喺地頭出擊絕對唔會踢得保守。
FC首爾亞冠入球王
FC首爾依家狀態唔見得好好，近6場比賽只贏過1場咁大把，當中包括主場以1比3不敵全北汽車。不過FC首爾早就將注意力放喺亞冠盃，留力今仗同全北汽車死過。FC首爾今屆亞冠盃10仗攻入24球，係賽事入波最多球隊，而且同全北汽車已經互相摸熟晒路數，可以明刀明槍鬥駁火，今仗隨時變成一場鬥攻入球騷！