馬體會防線告急
歐聯D組爆發榜首戰，上屆亞軍馬德里體育會主場迎戰拜仁慕尼黑，呢對組合亦係5個月前上屆準決賽翻版，當時雙方兩回合踢成2比2平手，馬體會憑作客入球優惠闖入決賽，今次高手再過招依然緊湊，預期入波唔會多，不過細盤賠率太奀睇見都唔開胃。考慮到拜仁換帥後已逐步重現宇宙最強風采，加上馬體會受傷兵問題困擾，拜仁讓平半有高水博上盤。
（有線61及201台周四凌晨2時45分直播）
馬體會近年喺防守上展現嚴密組織同強悍作風，連效力拜仁嘅西班牙中場堤亞高艾簡達拿亦盛讚，馬體會嘅防守世界最強。馬體會上季西甲主場19戰只失7球，如果計算跨季西甲同歐聯正式賽事，佢哋近9仗主場8勝1和合共只失1球，對手仲包括巴塞同拜仁呢啲勁旅，硬淨到癲。
馬體會開咧至今7場正式賽事保持不敗，但狀態睇落仍未回復上季盛時水準，最慘係上輪聯賽主場1比0慘勝拉科魯尼亞付出沉重代價，中堅荷西基文尼斯同防中奧古士圖費南迪斯同受重創，後者更要提早收咧，加上已經有另一主力防中堤亞高文迪斯，同意大利前鋒阿利斯奧施斯養傷，陣容不整，特別係防中痛失兩大將，遇上拜仁火力十足嘅中場面臨重大考驗。
拜仁今季搵到安察洛堤執教，有心復刻軒帥五冠王踢法外，亦更注重攻守平衡。喺上手教練哥迪奧拿領軍時，踢法受限制嘅一雙魔翼列貝利同洛賓狀態都返晒嚟，箭頭羅拔利雲度夫斯基得到更全方位同更直接供應，確有重現宇宙最強風采。拜仁開季8場正式賽事全勝，合共入27球僅失1球，目前全隊只有杜格拉斯哥斯達一位正選養傷，佢個位亦大把人踢到，無論狀態同陣容完整性，拜仁都在馬體會之上。
肥安食住施蒙尼
事實上，拜仁整體實力亦勝過馬體會，上季之失，主因係哥帥嘅柔弱作風，打硬仗明顯輸咗畀鐵帥施蒙尼。不過攞過兩屆歐聯亞軍嘅施蒙尼，比起曾3奪冠軍嘅安察洛堤又變番輸蝕；喺安帥帶領皇馬嘅兩年，兩位主帥已經喺歐聯兩度對決，2014年皇馬喺決賽加時贏波捧盃，翌年8強戰兩回合合計亦以1比0壓住施蒙尼，難怪施帥都承認，皇馬兩年前解僱安帥係一個錯誤嘅決定。