朗尼救贖戰今晚上演！英超曼聯今季大換血，昔日王牌球星朗尼上仗更加被貶為後備。「紅魔鬼」今晚喺歐霸盃A組迎戰索爾亞，朗尼將會帶領多位後備擔正，不過呢班「雪櫃兵」狀態麻麻，要攻陷防守力強嘅索爾亞唔容易，上半場好可能老鼠拉龜，「半場和」值得一試。
(Now 670周五凌晨3時05分直播)
曼聯喺莫連奴執教下大變身，近2仗終於摸熟一套穩定嘅正選陣容，好不幸嘅係，朗尼已經唔喺呢個最強11人之列，意味佢將要接受長坐冷板、專踢二線賽事嘅命運。莫連奴早就表明歐霸盃唔係佢杯茶，今仗極可能會畀伊巴謙莫域、保羅普巴、費蘭尼、桑馬達等主將休息，令朗尼有機會擔正證明自己，但係唔可以否認，朗尼季初狀態的確差勁，今仗佢會帶住達美安、馬高斯盧祖、迪比、舒尼達連等「邊緣人」上陣，呢班球員缺少比賽下狀態肯定唔弗。翻查數據，連埋A組首仗輸畀飛燕諾，曼聯近5仗歐洲賽主場都係開半場和，證明佢哋面對主守嘅客隊冇乜板斧。
索爾亞防守強唔係魚腩
來自烏克蘭嘅索爾亞名不經傳，今次係佢哋史上首次躋身歐霸盃分組賽，不過呢隊波近幾年成績穩步上揚，對上2季聯賽都排第4，目前更排喺烏超積分榜次席，9仗聯賽只係失過7球，防守係佢哋最強一環，分組賽首仗同費倫巴治打和，就證明索爾亞唔係魚腩。