德甲死神來了！科隆今季異軍突起，聯賽5戰3勝2和排第3位，唔只成績出色，業績亦靚，上一財政年度營業收入達到1.07億歐元（約9.3億港元），創下球會歷史新高。原來靠「棺材大王」韋拿改革，令球會脫胎換骨。榜首勁旅拜仁慕尼黑今晚主場遇上「死神」科隆，肯定要打醒十二分精神，避免重蹈歐聯輸波覆轍。
（Now 670、有線61、201台周六晚9時30分直播）
年僅40歲嘅韋拿做殯儀業起家，包括出售棺材、安排喪禮等業務一腳踢，甚至試過落手落腳幫忙清洗屍體，性格勤勞勇敢，夠膽進行大事改革。由於韋拿自小已熱愛足球，但冇運動細胞，未能成為球員，所以佢發達後，決定加入愛隊科隆，希望以佢嘅生意頭腦經營球會。科隆2014年回升德甲後，韋拿由財務總監做到會長，拉攏唔少大企業合作，令科隆不斷壯大。從球隊成績及業績來睇，韋拿已帶科隆走上成功之路，如果今場可以贏埋拜仁就更完美。當然，呢個難度相當高啦！
拜仁慕尼黑方面，主場安聯球場嘅草皮早前受真菌感染，搞到要成層草皮換過，會方利用上輪聯賽客戰漢堡、歐聯作客馬體會嘅空檔，重新鋪設草皮，新鋪設嘅全部都係天然草，唔再係原本部分係人造草皮咁嘅布局，更加有利球員發揮。
拜仁主場炒慣對手
事實上，拜仁慕尼黑經過上仗歐聯作客輸畀馬體會之後，返到自己地頭，冇理由再失威，面對「死神」科隆，都應會照攻。睇番拜仁近3次主場對科隆，取得全勝，兼且全部贏3球或以上，就算拜仁今場讓兩球，都要捧讓球主勝。