世盃外歐洲區G組競爭激烈，意大利今晚作客弱旅馬其頓，3分可以話係志在必得，不過「藍衣軍團」賽前傳出唔少不利消息，前鋒加斯安奴柏利因紀律問題被踢走，中場靈魂蒙杜利禾又受傷缺陣，意大利似乎又係要靠防線食胡，今仗作客頂多小勝，開中位數2.5球嘅入球細機會高。
（有線62及202台周一凌晨2時45分直播）
意大利上仗主場逼和西班牙，戰果算係唔錯，但佢哋全場只係得1次射中龍門，新帥雲杜拿似乎仲未搵到進攻套路。事實上意大利前鋒人才唔多，喺歐國盃表現出色嘅加斯安奴柏利，上仗因為被換走嗰陣大發脾氣拒絕握手，結果被雲杜拿踢出國家隊，今仗可用兵器又少一件。
據報意大利今場會用恩莫比尼同比洛迪擔正，但呢兩個前鋒絕對唔係頂級射手材料，自己搵食能力有限，最慘係中場派牌靈魂人物蒙杜利禾上仗受傷，已經證實要抖半年，所以藍衫軍入波機會唔慌多。好在意大利防守向來可靠，今仗只要博到1次機會就有機會贏波。
馬其頓死守博1分
馬其頓上仗主場對以色列，只係喺補時階段輸12碼，整體表現唔係太過魚腩，今仗對住意大利擺明會死守博1分，意國嘅鋒力要破密集唔易，細盤抵玩！