首回合0:0再鍊過
日聯盃今日上演4強次回合，兩場比賽都喺下午1點開波，睇番首回合戰況，浦和紅鑽喺作客環境下反勝FC東京2比1，實力明顯高一班，今日紅鑽仲有主場之利，晉級形勢大好，所以波童會花多啲筆墨喺另1場橫濱水手主場對大阪飛腳。飛腳對上5次作客水手未贏過，今仗唔敢貿貿然搶攻，入球中位數2.5球嘅細盤，有1.82倍分頭值博。
（有線61及201台周日下午1時直播）
日聯盃4強採兩回合制，總比數打和先計作客入球優惠，如不分勝負將加時30分鐘，加時階段唔計作客入球優惠，再和就要互射12碼分勝負。首回合水手作客飛腳和0比0，水手今仗雖有主場之利，但如果先失波，就要入夠2球先可晉級，中場主力齋藤學因要應付國家隊比賽缺陣，水手想入波難度倍增，相信先以唔失波為大前提。
水手後防夠集中
講返對賽往績，水手近4次對飛腳1勝3和，如果單計喺主場日產球場對飛腳，水手更已保持5戰不敗。其實講整體實力，兩隊相距唔大，但水手近期勝在後防夠集中，聯賽連盃賽近8仗有6仗保持清白之身，相反飛腳未踢首回合之前，連續5仗比賽加埋失咗12球，既然飛腳近年嚟到日產球場都冇好結果，預計今仗都會穩打穩紮，唔會過分搶攻，中位數2.5球嘅1.82倍細盤捧得過。
紅鑽質高吼上盤
至於另1場4強次回合浦和紅鑽對FC東京，剛才已經講過紅鑽無論實力同狀態都有優勢，加上紅鑽近5次對FC東京全部贏晒，紅鑽讓半一照捧上盤。
（有線63及203台周日下午1時直播）