另一場英超修咸頓主場對般尼，修咸頓成績反彈，好大程度上因為防線改善，包括盃賽在內，近6仗都保持清白之身。不過，呢支球隊顧得後但又顧唔到前，已連續2場同對手互交白卷，今仗修咸頓主W熱爆至1.29倍，讓球盤辣到讓一球、球半，未免太過火。般尼作客唔識入波，今仗應會主守博攞到1分，首選中位數2.5球入球細。
（Now 621及LeSports HK應用程式周日晚11時直播）
幾條戰線球員攰爆
修咸頓經過上月歐霸、英超、英聯盃3線作戰，合共取得4連勝之後，近2仗分別同比亞斯華夏普爾、李斯特城打和0比0，球員體力頂唔順，鋒線死晒火。事實上，修咸頓中前人腳質素麻麻，主力射手查理柯士甸今季英超只有2球進帳，另一前鋒沙恩朗更加未開齋，冇入球板斧之下，唔好寄望修咸頓可以大勝弱隊般尼。
般尼2場聯賽作客共吞6蛋確係慘，但要留意對手係車路士及李斯特城，大敗實屬非戰之罪。般尼上場聯賽同阿仙奴激鬥至補時階段，先至因為一個問題入球輸0比1，表現並唔失禮。呢支新升班球隊經過作客連接吃虧之後，加上前鋒安達格雷今仗停賽，更加唔會奢求攞3分，今仗只要唔輸已經達標，踢法唔慌進取。以修咸頓疲弱攻力，想咬入般尼亦非易事，預料悶戰一場，吼細盤啱數。