歐聯H組有法甲老牌球隊里昂主場對意甲班霸祖雲達斯，祖記堪稱「法國專家」，球隊史上曾出產多位法國名將，連帶對付法國球隊都特別有心得，近4次歐戰鬥法甲兵團，取得3勝1和，包括兩年半前歐霸盃「雙殺」里昂，加上里昂近況低迷，一於捧祖雲達斯客勝。
（有線流動版周三凌晨2時45分直播）
祖雲達斯同法國好有淵源，曾經擁有柏天尼、施丹、迪甘斯、查斯古特等法國名宿效力，為球隊創下輝煌成績。現時亦有艾拉在陣，新兵比真歷亦曾於法甲搵食多年，包括效力里昂3季，自然對對手瞭若指掌。
正因為祖記有濃厚法國色彩，可以做到知己知彼，近4次歐洲賽對法甲兵團，取得3勝1和，包括2014年4月歐霸盃8強，首回合作客贏里昂1比0，次回合主場再贏2比1，當年作客攻入全場唯一入球嘅邦路斯仍然在陣。值得一提，今屆歐國盃意大利就係喺里昂主場擊敗比利時，意軍以祖記兵為骨幹，呢個球場可以話係佢哋福地。而且祖記近期取得5連勝，前鋒保羅戴巴拿近3仗都入波，希古恩亦頻頻建功，今仗有力反客為主。
里昂態沉患恐意症
反觀里昂有「恐意症」，近3次對意甲球隊，全敗收場。最大鑊係近期狀態低迷，近4仗輸3仗，3場敗仗都冇波入，包括上輪歐聯0比1不敵西維爾。雖然射手拿卡錫迪傷愈，上仗聯賽後備上陣復出，但佢畢竟抖咗1個月，狀態仍不足，難對祖記構成太大威脅。