亞冠盃4強次回合續演南韓內訌，FC首爾主場迎戰全北汽車。FC首爾首回合作客慘敗1比4，今仗返主場盡地一煲力求收復失地，但會令防線更空虛。全北上仗被打破今季聯賽不敗身，但明顯留力今仗，加上近6次鬥FC首爾獲5勝1和，作客都冇有怕，受讓必選1.63倍嘅讓球客勝。
（Now 671及Now Fox Sports Play周三晚6時30分直播）
FC首爾首回合落後1比4，換言之今仗起碼要贏3比0或更大比數，先至可以晉級，球隊冇得揀豁出去喪搶。不過佢哋狀態麻麻，近9仗只得3勝3和3負，當中4仗主場僅獲1勝，可見地利幫助唔大。事實上，FC首爾落後太多，如果今場未能一早入波好可能會洩氣，讓波更加信唔過。
FC首爾近6次交手未贏過
全北汽車個決賽席位只差半步，上輪聯賽鬥濟州聯正選收起列卡度盧比斯、金信煜及李在成等主力，搞到輸2比3，可謂敗不足據。況且呢支韓職榜首勁旅近4仗亞冠盃獲3勝1和，包括8強次回合大炒上海SP 5比0，4強首回合又贏FC首爾4比1。兩隊近6次交手，全北取得5勝1和，明顯格食格，今仗再出征首爾，仲有得受讓，梗捧讓球客勝。