「兵工廠」炮火連天！近況大勇嘅阿仙奴今晚英超再度登場，主場迎戰護級分子米杜士堡，主隊幾支大炮近期全面撻着，奧斯爾、阿歷斯山齊士同禾確特起勢咁入波，今仗仲有法國中鋒「銀河唯一」基
奧特傷愈候命，米杜士堡想搶1分嘅如意算盤好難響，不過主勝賠率得1.17倍冇肉食，不如直取1.62倍嘅讓球主勝！
（Now 621及Le SportsHK應用程式周六晚10時直播）
阿仙奴近期狀態弗到冇朋友，聯賽同盃賽加埋已經連贏7仗，其中5仗更係淨勝對手2球或以上，包括周中歐聯6比0狂數盧多格德斯。領隊雲格今季將阿歷斯山齊士改造成正箭頭，效果非常顯著，「A山」
喺7連勝走勢入面，交出5入波同4助攻，帶挈向來入波唔多嘅奧斯爾近2仗喪轟4球，加埋近6仗入7球嘅「首席射手」禾確特，呢條鋒線認真得人驚。
基奧特復出有埋Plan B
「兵工廠」上輪把握曼城失分，喺聯賽榜追至同「藍月亮」同分，依家梗係食住個勢繼續衝。阿仙奴近期踢得最辛苦1仗，就係作客「泊大巴」死守嘅般尼，要到補時最後一刻先贏1比0，不過阿仙奴今仗
有空中霸王基奧特傷愈，有佢做進攻嘅Plan B，絕對有把握攻破死守陣。
米杜士堡開季8仗的聯賽對手實力唔強，除熱刺同愛華頓外，其餘只係史篤城、水晶宮同西布朗等同級球隊，可惜佢哋至今只係贏過包尾的新特蘭，上仗主埸面對屈福特都要輸0比1，近5仗聯賽1和4負，
搞到依家排緊尾4，而且中堅哥林張伯斯限於外借條例唔可以倒戈，今仗被迫休戰，防線更加靠唔住，好難阻「兵工廠」發圍。