另一場英聯盃16強上演「倫敦打吡」，韋斯咸主場鬥車路士，車仔如日方中，炒完李斯特城，再炒曼聯，領隊干地已搵到「油門」，可全力衝刺。而且「錘仔幫」攻守主將施蒙尼沙薩、奧邦拿都係干地舊部，有幾多斤両，逃唔過干地法眼，今鋪擺明食住韋斯咸，捧客勝。
（周四凌晨2時45分開賽）
韋斯咸未踢慣新主場
兩隊今季英超開鑼戰已交過手，當時干地剛上「車」，險勝2比1。經過兩個幾月磨合後，干地「揸車」技術愈來愈好，特別吞兵工廠3蛋教訓之後，呢位意大利名帥下定決心，用番執教祖雲達斯期間最擅長3後衞陣式，攻守更平衡，取得3連勝兼不失球，上仗打到曼聯一戙都冇，大勝4比0。雖然干地今仗可能會畀部分主力休息，但上仗後備名單上嘅韋利安、奧斯卡杜斯山度士、巴舒亞伊，甚至老將泰利，都係高質素球員，加上要爭奪正選，有機會上陣，肯定搏命。
韋斯咸今季搬去新主場倫敦奧林匹克球場，發揮唔出地利優勢，包括盃賽，8次主場只有4勝1和3負，所贏對手只係當姆薩尼、般尼茅夫、阿克寧頓、新特蘭之流，其中上仗主場對英超包尾嘅新特蘭，要踢到補時4分鐘先至入波，今仗遇上來勢洶洶嘅車仔，睇怕招架唔住。