今晚免費電視台會直播一場德國盃次圈賽事，由衞冕冠軍拜仁慕尼黑主場迎戰奧格斯堡。拜仁經過早前嘅小低潮後，球隊已經連贏兩場，狀態同信心相信回復唔少。奧格斯堡近況低沉，球隊連續3場贏唔到，加上嚟緊周末德甲會喺主場再鬥拜仁，今仗作客未必會出全力應戰，讓球主客和拜仁雖然要讓兩球，但阿謙照捧讓球主勝。
（無綫翡翠台周四凌晨2時45分直播）
為冧莊唔會hea踢
拜仁對上4屆曾3度捧走德國盃，可見球隊爭盃決心係毋庸置疑，上圈作客低組別球隊卡爾斯耶拿亦未有留力，一眾主將羅拔利雲度夫斯基、湯馬士梅拿、拿姆、阿拉巴及紐亞等主力俱正選上陣，最終大勝5比0，今圈返主場出戰，預計亦會強陣撲擊對手奧格斯堡。拜仁早前雖經歷3場不勝嘅小低潮，但球隊好快已經連贏兩場回復信心，今仗就算有列貝利、畢斯杜巴同拿菲爾因傷缺陣，相信都會全力爭勝。
「奧堡」現時喺德甲排第12，球隊近期表現一般，已經連續3場未贏過，佢哋至今喺德甲8戰只入7球，前線火力平庸亦令人非常擔心。事實上，奧格斯堡作客嘅表現亦未如理想，對上3場客戰只得1和2負嘅成績，加上球隊本周末會喺主場再鬥拜仁，阿謙相信佢哋今仗會留力，等返主場先全力出擊，因此讓球主客和拜仁雖然要讓兩球，但讓球主勝仍值得支持。