歐聯A、D組4大豪門今晚要搶先出線！呢兩組形勢分明，A組阿仙奴、巴黎聖日耳門（PSG）分途出擊，只要其中1隊贏波及另1隊唔輸，就可以攜手晉級16強。D組馬德里體育會、拜仁慕尼黑如果一齊贏波，亦能夠雙雙出線。適逢4大勁旅今輪對手都係「1分魚腩」，相信可以完成「簡易任務」，準備開派對慶功！
阿仙奴PSG有鑊氣
A組阿仙奴、巴黎聖日耳門同樣3戰有7分，組內另外兩隊包括盧多格德斯、巴素利各得1分。因此，阿仙奴今仗作客盧多格德斯，巴黎聖日耳門作客巴素利，其中1隊贏波及另1隊唔輸，就可力壓兩支弱隊，穩佔出線位置。阿仙奴要贏盧多格德斯應該冇問題，兵工廠上輪先至大炒呢支保加利亞球隊6蛋，可見雙方實力相距幾條街。由於阿仙奴最終可能需要同聖日耳門以得失球決出小組首名誰屬，更加要把握今仗機會，盡數盧多格德斯，直取讓球客勝。
（有線62及202台周三凌晨3時45分直播）
巴黎聖日耳門上次主場3比0輕取瑞士球隊巴素利，預料今仗作客形勢唔會有大變化，特別係聖日耳門前鋒卡雲尼狀態弗到震，近5仗射入5球，巴素利防線好難抵擋呢位烏拉圭國腳。不過巴素利近7次主場對法甲球隊取得4勝2和1負，並唔失禮，今仗有望破蛋，捧大盤。
（有線流動版周三凌晨3時45分直播）
拜仁馬體會大小通吃
D組馬德里體育會3戰3勝，今仗主場只要贏埋羅斯托夫即可出線，甚至乎如果同組拜仁慕尼黑作客唔輸畀燕豪芬，馬體會和波都搞掂，晉級機會高唱入雲，可以歎慢板來踢。事實上，馬體會今屆3場歐聯都係小勝1比0，揀中位數2.5球入球細為佳。
（有線流動版周三凌晨3時45分直播）
如果馬體會不敗，拜仁慕尼黑只要贏燕豪芬亦可提早出線，相信呢支德甲班霸作客都會照攻搶3分。燕豪芬上次作客拜仁大敗1比4，若然今仗再輸即出局，背水一戰無懼同拜仁駁火，首選中位數3/3.5球嘅大盤。
（有線64及203台周三凌晨3時45分直播）