今晚歐霸盃除咗曼聯之外，亦要留意埋I組，尼斯主場對薩爾斯堡。法甲「神奇球隊」尼斯唔止聯賽力壓豪門巴黎聖日耳門做緊一哥，最犀利係令巴洛迪利大翻身，「巴神」今季各項賽事，7次披甲共轟入7球，換言之平均1場入1粒，今晚等睇佢表演。奧地利球隊薩爾斯堡分組賽3戰全敗，恐怕已經無心戀戰，尼斯主W1.75倍值博。
（Now Fox Sports Play周五凌晨4時05分直播）
尼斯今季由前慕遜加柏主帥法夫爾接手領軍後，表現脫胎換骨，聯賽11戰取得9勝2和，拋離巴黎聖日耳門6分，比上季英超李斯特城更「神奇」。法夫爾最犀利都係獨具慧眼，簽入AC米蘭及利物浦棄用嘅「人球」巴洛迪利。呢位26歲意大利前鋒幾乎失業，難得獲尼斯收留，果然大踢爭氣波，5場法甲入6球，兩次歐霸盃上陣亦有1球進帳，腳風非常順。事實上，「巴神」以往代表曼城及利物浦，總共踢咗11場歐霸盃，入咗5球，可見佢踢呢項賽事，入球率好高，尼斯有巴洛迪利助陣，取勝把握大增。
薩爾斯堡3連敗出線渺茫
薩爾斯堡喺奧甲也文也武，但出去踢歐洲賽，明顯未夠班，近5場歐洲賽僅1和4負，包括上輪歐霸盃主場0比1不敵尼斯。薩爾斯堡現時3場分組賽都輸波，出線機會非常渺茫，難免打擊士氣，甚至可能已採取放棄態度，專心爭聯賽錦標。薩爾斯堡戰意成疑情況下，當然捧尼斯主勝為佳。