贏埋呢場就升班，北海道札幌岡薩多今日作客德島漩渦又點會唔搏？呢場日乙巨人對侏儒之戰，札幌小讓平半，博1.77倍上盤最保險。（周日中午12時開賽）
札幌目前喺日乙帶頭，領先次席松本山雅3分，第3位嘅清水心跳6分，由於聯賽只剩3輪，札幌今日只要贏波，雖則仲未攞到冠軍，但就肯定名列前兩名，來季可以直升日職，所以戰意毋須懷疑。
plan定班底踢日職
其實札幌內部根本就plan緊升班後點樣強化班底，佢哋個南韓22歲龍門具聖潤，今季表現出色，29次披甲失29球，失球數字喺日乙屬於最穩健嘅門將之一，日職豪門鹿島鹿角曾經打佢主意，不過札幌就獅子開大口，冇超過1億日圓（約752萬港元）免談，從而嚇退對方。呢支北方球隊咁做，原因就為咗保留現有班底，寧願要人唔要錢。據講射手都倉賢、守衞福森晃斗、龍門金山隼樹幾個都係會方不惜代價都要留低嘅骨幹，札幌咁早就部署來季，足見佢哋升班決心大。
當然，中游分子德島雖則冇嘢好爭，但係呢支打法機動嘅球隊，主場12次出戰札幌取得3勝6和3負，往績完全係均勢波，數據反映札幌要大勝唔容易。問題係札幌升班目標就差呢3分可以實現，況且佢哋班球員平均身高，完全壓倒矮仔多嘅德島，尤其1米87嘅中鋒都倉賢，更加係德島最頭痛嘅巨人，齋玩高空轟炸呢瓣，札幌都夠條件全取3分。