皇馬掃「雷」 勢演大屠殺
西甲「一哥」皇家馬德里近期火力驚人，威爾斯球星加里夫巴利愈戰愈勇，佢同上星期打破入球荒嘅C朗拿度合組超強鋒線，周日晚主場迎戰開始「露底」嘅雷加利斯，大屠殺味道極濃，不過讓球主客和皇馬讓到3球實在太辣，不如穩穩陣陣玩中位數3.5球嘅入球大，更加實食冇黐牙。
（now 632周日晚7時直播）
皇家馬德里係目前西甲唯一一支不敗球隊，雖然9月底曾陷入各項賽事連和4場的低潮，不過球隊迅速回復狀態，近6場比賽有5場可以攻入對手3球或以上，不過周中歐聯畀歷基亞入3球，證明球隊防守都唔太穩陣，比比同沙治奧拉莫斯受傷令中門大開，連續10場比賽有失波唔係偶然。
雷加利斯道氣一過現形
作客嘅雷加利斯今季升班後，一度踢出唔錯成績，包括主場守和馬德里體育會，不過佢哋被對手洞悉後逐漸露出本來真面目，近3仗聯賽全部落敗，上一場作客賽事就慘吞馬拉加4蛋，可見雷加利斯同其他勁旅有極大距離，今仗造訪巴拿貝球場肯定會有大量失球，考慮到佢哋喺巴塞隆拿同西維爾身上都入過波，破蛋機會亦唔細。
西維爾巴塞開火鬥轟
西甲今輪壓軸大戰周日深夜上演，由兩大勁旅西維爾同巴塞隆拿正面交鋒，主場出擊嘅西維爾今季表現穩定，輸波次數甚至少過今仗對手巴塞，對住「地上最強」亦有力一戰，鹿死誰手難以預料，肯定嘅係雙方均有強大火力，入球大細中位數3.5球，照捧入球大。
（now 632周一凌晨3時45分直播）
西維爾目前只比巴塞隆拿少1分，兩大射手韋圖同賓耶達今季已有5個入球進帳，加上今季聯賽主場5戰全勝嘅氣勢，即使對手係巴塞隆拿，西維爾亦有信心主動進攻。西維爾今季聯賽主場平均入球達2.4球，火力唔弱，對住巴塞隆拿嘅不穩防線有機會搵到食。
地上最強失波唔少
巴塞隆拿火力強已經唔使解釋，美斯、蘇亞雷斯同尼馬嘅「MSN」組合入波當食飯，雖然今仗作客，但巴塞今季客場火力有增無減，對上4仗聯賽作客合共攻入16球，即係平均每仗入4球，而喺呢4場作客賽事當中，每場總入球更至少達到5球，從中可見巴塞隆拿鋒力雖然強大，但防線亦受到嚴重傷兵困擾，主力馬菲奧、佐迪艾巴等均受傷仍然缺陣，碧基亦未知出唔出得，可以預期今場大戰會有大量入球湧現，中位數3.5球吼大盤絕對穩陣。