護級方面，福岡黃蜂同湘南比馬已篤定降班，餘下1個降班席位，將不出磐田山葉、甲府風林、新潟天鵝同名古屋鯨魚呢4隊，當中以天鵝同鯨魚形勢最差。天鵝今日主場對廣島三箭，除咗對賽往績蝕底，更有多名主力停賽及因外借條例未能上陣，阿謙推介三箭贏波。
（周四中午12時30分開賽）
缺4將難敵三箭
日職總職分排名最後3隊將會降落日乙，黃蜂同比馬已肯定降班，而排13嘅山葉、14嘅風林、15嘅天鵝同16嘅鯨魚則會有1隊陪降。山葉目前以33分排13，只要和波就護級成功。至於以32分排第14嘅風林只要贏波，就唔使理天鵝同鯨魚嘅賽果亦可以留級，所以形勢最差係天鵝同鯨魚。
天鵝今晚主場對三箭，球隊上仗對飛腳輸波之餘，仲有中前場主將拿費爾達施華同里奧施華攞紅牌被逐，今仗要坐波監；後防主將米高費斯格拉特亦因黃牌夠數要停賽，再加上三箭借將中場野津田岳人亦無法上陣，令球隊一下子失去4位主力。三箭近9次鬥天鵝7勝2和，「格食格」有望贏波踢天鵝落日乙。至於鯨魚會喺主場對肯定降班嘅比馬，球隊近4仗取得2勝1和1負狀態平穩，射手施莫域同永井謙佑近期成日有波入；至於作客嘅比馬有中場菊池大介累積黃牌停賽，推介主勝。