雙料冠軍沉淪榜尾
今季澳職暫時最令人意外嘅，肯定係上季「雙料冠軍」阿德萊德聯沉淪榜尾，佢哋今日主場硬撼布里斯班獅吼，同樣係毫無勝算。阿德萊德聯今非昔比，聯賽4連敗令士氣跌落谷底，近期更加係傷兵滿營，相反布里斯班獅吼聯賽連贏3仗，此消彼長之下，梗係寧買當頭起，力撐獅吼客勝。
（有線64及203台周五下午4時50分直播）
貴為上季常規賽及季後賽雙料冠軍，阿德萊德聯今季出現大滑坡，開季至今聯賽頭5仗不勝之餘，近4仗更錄得全敗，包括上仗領先下被弱旅中岸水手反勝2比1，最搞笑嘅係，阿德萊德聯連續4場輸波都係以1比2嘅比數落敗，證明防守的確好唔掂，依家位列包尾令人失望。
屋漏偏逢連夜雨，阿德萊德聯嘅傷兵潮仍然嚴重，雖然阿根廷中場卡路斯卡已經復出，但係好似佐敦艾斯、馬朗尼、米利奧斯歷、沙治奧施里奧、軒歷基安達迪等球員都仲受到傷患困擾，就算主帥兼前巴塞名宿阿摩有三頭六臂，亦巧婦難為無米之炊。
獅吼3連勝客W要追
另一邊廂，布里斯班獅吼擺脫頭2仗聯賽不勝困局，一口氣連贏3仗，呢3仗更加係上半場已取得領先，雖然箭頭占美麥卡倫要踢國際賽會缺陣，不過獅吼已經喺谷底反彈。目前兩軍狀態一高一低，獅吼必定乘住強勢追打「落水狗」，客勝不容錯過。