冰島喺世盃外圍賽I組，作客克羅地亞，兩隊現時同為7分，主場嘅克羅地亞以較佳得失球壓住冰島排榜首，論狀態雙方勢均力敵，不過有莫迪歷復出領軍嘅克羅地亞，整體質素無疑較高，加上往續佔盡上風，主場出擊可望奏凱，讓球盤克羅地亞今仗讓1球，可博上盤。
（有線64及203台周日凌晨1時直播）
克軍莫迪歷強勢復出
克羅地亞喺歐國盃表現唔及冰島搶鏡，但事實上「格仔兵團」實力係更高，佢哋已經超過1年未喺國際賽法定時間之內輸波，近14場國際賽錄得10勝4和嘅亮麗成績。何況因傷缺陣多時嘅中場靈魂莫迪歷，傷愈後即時獲得重召，呢位皇馬球星壓陣會大大加強球隊戰鬥力，主場出擊實在係不勝無歸。
冰島喺歐國盃憑「維京集氣」嘅神奇之旅贏盡掌聲，但球隊名氣提升後，對手亦會更加認真去對待佢哋，冰島要再創佳績難度必定大大增加。冰島喺今屆分組賽目前只踢過1場作客，就係同烏克蘭踢成1比1平手，而且佢哋過去4次同克羅地亞交鋒1和3負，明顯畀「格仔兵團」剋住，今仗似乎難再「集氣」創造奇迹。