般尼茅夫遇強即屈
月初時候，樂比曾講過阿仙奴會受到11月魔咒影響，結果兵工廠果然宿命難違，連和3場，但今晚英超主場面對遇強即屈嘅般尼茅夫（綽號The Cherries），阿仙奴相信可食到呢粒熟晒嘅「櫻桃」，讓一球/球半照捧上盤。
（Now 621及LeSports HK應用程式周日晚10時15分直播）
上季先升上英超嘅「櫻桃」般尼茅夫，今季已企穩陣腳暫列中游，少帥艾迪侯域除被視為未來英格蘭主帥人選，季初更盛傳阿仙奴出手挖角以佢接替雲格，究竟艾迪侯域點解咁把炮？除咗因為佢用蔗渣價錢，踢出燒鵝味道，更重要係踢出悅目嘅進攻足球，更有人將般尼茅夫同巴塞隆拿相比，都咪話唔厲害！
公認為球癡嘅艾迪侯域平時最鍾意煲碟，研究世界各地足球戰術，而影響佢最深嘅就係哥迪奧拿同雲格，兩者都崇尚進攻足球，所以般尼茅夫踢落絕對唔似一支只識泊大巴嘅中下游球隊，而係好有個人風格，敢於用波嘅進攻型球隊。
雲格都相當認同艾迪侯域嘅理念，所以季初讓愛將韋舒亞以借用形式加盟般尼茅夫，結果般尼茅夫多咗呢位沙維式中場核心，今季踢高一班波，但可惜韋舒亞今場因借用條例未能倒戈，令般尼茅夫實力大打折扣。
兵工廠往績贏晒
或者因為般尼茅夫踢法過於進取，即使佢哋有大炒同級球隊嘅能力，但面對強隊時成績卻稍遜，今季作客曼城吞過4蛋，季初主場輸過畀曼聯1比3，而翻查上季對曼城，車路士、熱刺都失過4球或以上，可見佢哋對住攻力強嘅球隊真係冇乜符，況且阿仙奴上季兩次交手都能夠輕取2比0，大有格食格味道。
阿仙奴聯賽連和2場後，今仗爭勝意欲甚強，前鋒基奧特復出後腳風甚順，近5次上陣射入5球，多咗佢喺前線衝鋒陷陣，進攻多元化咗好多。雖然阿仙奴最近成績麻麻，但考慮到對手如曼聯、熱刺及巴黎聖日耳門全部係硬嘢，今場對易食嘅「櫻桃」，相信唔會放過開餐大好機會。