落後全北1粒 終極戰焗攻
亞冠盃上演決賽次回合終極一戰， 阿聯酋豪門艾阿恩主場對南韓勁旅全北汽車，艾阿恩首回合輸1比2，今仗返回自己地頭，肯定全力搶攻，力爭盡快收復失地。全北汽車屬於主攻型球隊，一對夢幻組合李安納度洛迪古斯、李東國今屆亞冠盃已合共轟入15球，加上佢哋被對手取得作客入球，今仗亦唔可以一味死守。兩軍隨時大駁火，首選中位數2.5球入球大。
（Now 672及Fox Sports Play周六晚10時25分直播）
艾阿恩財力雄厚，擁有唔少進攻猛將，包括阿聯酋國家隊中場大腦奧馬鴨都拉文，鋒線有上季協助廣島三箭捧日職總冠軍嘅戴恩費斯杜格拉斯，呢位巴西前鋒今屆亞冠盃已有5球進帳。由於艾阿恩中前場人腳質素佳，踢法自然比較進取，4強兩回合共喺卡塔爾球隊艾查殊身上取得5個士哥，決賽首回合作客全北汽車，亦先開紀錄，更何況今仗許勝不許和，勢必喪攻對手。
全北孖寶掛帥搶「保險球」
全北汽車同樣擅長進攻，首回合落後劣勢下，靠李安納度洛迪古斯梅開二度反勝艾阿恩，呢位巴西進攻中場今屆亞冠盃已累積攻入10球，仲有大賽經驗豐富嘅名將李東國助陣，全北汽車火力不在艾阿恩之下。事實上，全北汽車首回合主場僅贏2比1，被對手取得作客入球，如果「全汽」今仗輸0比1，艾阿恩就可憑作客入球優惠捧盃。因此，形勢上唔容許全北汽車過分主守，今仗最好都要取得作客入球做「保險」，有利製造入波。